看完上述兩位嘅文章，讓小弟這位算不算中男嘅傢伙（我個樣話係中男太缺乏說服力），講一吓自己嘅睇法。
1. 香港無嘢多，最多三姑六婆走去問人你幾時嫁，幾時結婚呀，朋友間講笑尚可容忍（我不否認我有時會開呢類玩笑），但實際上，中女嫁唔嫁關你叉事呀。（但方潤搵唔搵到老婆，就好多人關注，佢嘅情況比較例外，民間一定比新加坡政府嘅社交發展署做得好。XD）
2. 中女求其搵人嫁，唔理好醜但求就手，甚至明知唔啱都要不惜一切瘟仔，果吓就好得人驚。我之前講過一單，有位中女嫁個大自己十幾年嘅老公，搞到一鑊泡嘅個 案，她咁都肯嫁嘅原因，就係頂唔順屋企人壓力，一段問題多多嘅婚姻，問題遠大過嫁唔出。所以唔好求其搵個人嫁，我用司徒法正嘅tone講：出事架嘛。
3. 依家啲男人係唔係信愛情己死，唔係，至少好似我呢類傻佬係存在嘅。問題係，依家太多港媽，搞到港男一早己經打定輸數，所以衍生問題係婚外情，結咗婚至發現愛情，但愛情原來唔喺自己個老婆度，真係大鑊到爆。要中男們恢復信心，真係有啲難度。
4. 我比較相信運氣不佳呢回事，小弟喺大學時代有位朋友，雖談不上靚女，但絕對係賢妻良母嘅典型，但她依家竟然嫁唔出，原因係遇唔到個啱心水。遇唔到啱心水好奇咩，Leona講嘅運氣不佳論，相對合理。
5. 有啲中女或中男唔結婚，因為佢地追求嘅愛情，可能永遠都做唔到，但果個人痴心一片你又無話可說。好似劉若英，鋪鋪奶茶（劉若英嘅花名）嘅演唱會都有人問她幾時嫁，呢個問題真係純粹俾娛記寫稿用。睇過果集陳昇同劉若英一齊嘅《桃色蛋白質》(按：為什麼劉若英在節目中可以哭成那樣子？二人好像不介意打開肚皮讓觀眾知道他們的感情事？在鏡頭前講這些話，到底有幾多成是真？)，都知道劉若英對陳昇果種痴心，旁人無法理解，你亦好難搵個人取代陳昇，呢種由師徒關係搞搞吓搞到變情人關係嘅，係幾種最一鑊泡個案典型。呢類人，你唔好問佢幾時嫁，免得揭起人嘅傷心事。有時中女或中男唔結婚，背後嘅故事有時好難開口，外人唔理比較好。
人在江湖十幾年，有時我真係一副睇到化嘅態度去睇事情，因為聽過嘅故事，輔導過嘅個案，光怪陸離，幾膠都有。家家有本難諗的經呀，做人唔好太八卦好。
後話：有機會，我會同大家分析吓劉若英同陳昇果挺狀況，到底發生咗乜事。但簡單嚟講，越係聰明理智知道自己要乜嘅人，佢地處理愛情問題上越係一塌糊塗，烏厘單刀，或者成世人有好多遺憾唔知點處理。
No comments:
Post a Comment