分手的理由

如果認為拍拖只有甜沒有苦的人，大抵不會有好結局，因為他們不懂犧牲 - 以對方最大的好處為大前提 - 希望自己得到最好，半點都不肯吃虧，註定拍拖失敗收場 (一個願打，一個願捱者另計)

每一次失戀，代表有東西未做好，這能在分手的理由中略知一二...下文對此的見解甚為到肉，不妨參考參考：

我地步伐唔一致

唔知聽過幾多朋友，用呢個理由同自己既另一半提出分手啦。

步伐唔一致…我諗大概係話，其中一個人響長大既過程裡面，行得快過另外一個。行得快d果個，覺得因為成熟既速度同另一半有太大差距，而導致大家再冇辦法溝通。咁欠左溝通，兩個人就再唔能夠成為soulmate，於是乎，「因了解而分開」。

大致係咁上下啦，我估。

呢幾年呢，咁上下既故仔，我真係聽過好多好多。

而故事既佈局，多數都係其中一方好著緊自己既事業，好想搏殺，而另一方就覺得對方俾太少時間自己，咁緊張事業果方就覺得另一半好唔成熟，咁大個人都不分輕重咁囉。

緊張事業果一方，覺得要另一半去體諒自己。覺得假如對方唔懂得去體諒，係罪過，亦係幼稚既表現。至於果位被評為唔體諒既一方呢…又覺得自已既地位好低，好唔受到重視，另一半總係唔放自己響首位，心裡面唔好過。
於是結論係，大家既步伐唔一致。你唔明我，我由唔了解你。分手囉…大鑊d既，離婚囉。

係咪大家都響不知不覺間，變得自私左呢？自私不特止，仲響自我原諒既情況之下，將自己既自私，合理化左？

有時我諗，兩個人走埋一齊，係一個大家都要付出既過程。兩個人相處響得到「成果」同「快樂」之前，必定要經過一個犧牲既process。犧牲，梗係唔過癮啦，難聽d講直頭係蝕章啦。不過用一個銅臭些少既角度去睇丫，呢個「犧牲」，好似投資咁。你唔拎錢出黎投資，邊庶會有回報呀。

咁犧牲左又一樣唔一定包生仔，投資都有風險啦。我有時覺得呢個世界好多野係贏唔晒既。你要有一段美滿既婚姻，或多或少你可能要響事業上作出些少調節。調節左既事業，可能冇未調節之前可以去得咁遠都唔定，但係你既回報，係你既家庭生活囉。

當然，剛剛講果個例子，可以調轉黎講都一樣通既。每個人對人生既要求都唔同。呢一part多左d，另一part可能好難避免少返dd。

唔知係咪年紀大左所以開始消極呢？我開始傾向，凡事盡左力就算啦，做得幾多得幾多。我見過好多追求響人生各方面都要「贏晒」既人，最後反而輸得最慘。

我寧願平衡一d，唔好樣樣都嘗試「贏盡」啦。步伐，可以自行調節既其實。睇下雙方願唔願意先蝕些少章囉。